Бинго тортата некогаш беше незаменлив десерт за разни прослави. Уникатна е по тоа што се прави од три вида бисквити, а сокот од портокал му дава посебен вкус.
Рецептот го најдовме на YouTube каналот Natašine Slastice, на кој пишуваше дека тортата можете дополнително да ја декорирате со мелени бисквити и рендано чоколадо.
Потребни состојки:
- 5 јајца
- 5 лажици шеќер
- 3 лажици брашно
- ½ кесичка прашок за печиво
- 3 лажици масло
- 7 лажици мелени ореви
- 1 лажица какао во прав
за кремот:
- 4 кеси пудинг од ванила
- 1,5 л млеко
- 200 гр шеќер
- 250 гр маргарин или путер
- 150 гр мелени бисквити
- 150 гр стопено чоколадо
друго:
- 200 гр пишкоти
- 2 кутии ресани
- 400 мл газиран сок од портокал
- 500 мл шлаг
Подготовка:
Прво ќе го направите кремот. Во еден сад измешајте ги пудингот, шеќерот и 200 мл млеко и измешајте. Остатокот од млекото истурете го во тенџере и варете на тивок оган. Кога ќе зоврие, тргнете ја тавата и измешајте ја смесата со пудинг, млеко и шеќер, па вратете ја на шпорет и продолжете со варење додека не се згусне.
Топлата крема префрлете ја во сад, покријте ја со фолија и оставете да се излади. Кога кремот ќе се олади, извадете ја фолијата, додадете го маргаринот (или путерот) на собна температура и сè убаво изматете со миксер. После тоа, поделете го на три еднакви делови.
На едниот дел од кремот додајте мелени бисквити, а во другиот растопено чоколадо. На третиот дел од кремот не треба ништо да додавате.
После тоа, почнете да ги подготвувате бисквитите. Измешајте ги брашното, прашокот за печиво и какаото. Во друг сад изматете ги белките додека не се формираат цврсти врвови. Во трет сад изматете ги жолчките и шеќерот додека не добиете пена, па додадете го маслото и кратко изматете.
Додадете го брашното во смесата со жолчки и продолжете со матење. Кога смесата ќе стане изедначена, со лажица измешајте ги белките. На крај додадете ги мелените ореви и повторно измешајте сè заедно.
Истурете ја смесата во калап со дијаметар од 28 сантиметри, кој претходно сте го обложиле со хартија за печење. Се пече во загреана рерна на 180 степени околу 30 минути. Кога ќе се испече, оставете го да се излади и потоа извадете го од калапот.
Натопете го пандишпанот со приближно 150 мл сок од портокал. Врз пандишпанот премачкајте го кремот со мелените бисквити. Наредете ги ресаните кои сте ги натопиле во сок од портокал и ставете ги врз кремот. Чоколадниот дел од ресаните мора да биде свртен надолу.
Намачкајте ги ресаните со чоколадниот крем. Потопете ги пишкотите во сокот и наредете ги врз чоколадниот крем. Над пишкотите распоредете го жолтиот крем и оставете да се излади во фрижидер барем неколку часа. Кога тортата ќе се стегне, изматете го шлагот и премачкајте го преку тортата.
