Биткоинот денеска достигна рекордно ниво во последните шест месеци и се приближи до највисоката вредност во историјата, што ја достигна во април.
Најголемата криптовалута во светот се зголеми за речиси четири проценти до 59,465 американски долари во времето на ова пишување.
Тоа е највисоката вредност на биткоинот од средината на април, кога беше на рекордни 64.895 долари.
Американската комисија за хартии од вредност (SEC) е подготвена да дозволи првиот американски биткоин пасивен трговски фонд (ETF) да започне со тргување следната недела, објави Bloomberg во четвртокот.
Бен Казелин, шеф за истражување и стратегија на азиската берза за крипто-валути AAX, рече дека скокот на биткоинот над 59.000 долари не бил произволен и бил акумулиран од долгорочни инвеститори веќе некое време.
„Се очекува да се постигне значителен напредок околу американскиот биткоин ETF во четвртиот квартал“, рече тој.
Настаните во петокот, исто така, беа поттикнати од твит од канцеларијата за образование за инвеститори на SEC, рече тој.
„Пред да инвестирате во фонд кој има фјучерс договори за биткоин, внимателно проучете ги потенцијалните ризици и придобивки“, се вели во соопштението на SEC.
Инвеститорите во криптовалути чекаа вести за одобрување на првиот биткоин ETF во земјата, а некои веруваат дека овој потег може да го забрза неговото усвојување и тргување.
Неколку менаџери на фондови, вклучувајќи ги и VanEck Bitcoin Trust, ProShares, Invesco, Valkyrie и Galaxy Digital Funds, се регистрираа за лансирање биткоин ETF во САД. ETF за криптовалути беа лансирани оваа година во Канада и Европа.
Претседателот на SEC, Гери Генслер, изјави претходно дека пазарот за криптовалути вклучува многу валути кои можат да бидат нерегистрирани хартии од вредност и ги остава цените отворени за манипулација, оставајќи милиони инвеститори ранливи на ризици.
Во извештајот на Bloomberg се вели дека предлозите на ProShares и Invesco се базирани на фјучерс договори и биле поднесени според правилата на заемните фондови, за кои Генслер рече дека обезбедуваат „значителна заштита на инвеститорите“.
SEC не одговори веднаш на барањето за коментар за извештајот на Bloomberg.
