Кинеските власти повторно тргнаа во акција против бизарниот обичај да се изведува стриптиз на погреби. Службите тврдат дека овој обичај го нарушува општествениот морал, што претставува огромен проблем, особено во руралните средини.
Бурлескното шоу што го изведуваат професионални стриптизети се нарачува од страна на ожалостеното семејство за да покаже колку е богато. Овој обичај почна сѐ почесто да се практикува во изминатите години.
Во изминатиов месец службите се фокусираат посебно на „стриптиз и други недолични порнографски претстави“ што се изведуваат на погреби, венчавки и други традиционални јавни собири, соопшти кинеското Министерство за култура.
Властите во два наврати, во 2006 и во 2015 година неуспешно се обидоа да стават крај на овој бизарен тренд. Вториот пат акцијата се прошири на 19 градови во четири кинески провинции.
Новата кампања апелира луѓето да се јават на специјалната „жешка линија“ ако забележат недолично однесување на погреб и да ги пријават нарачателите, за што ќе следи „парична награда“.
Властите посебно имаат ставено фокус на танчарската група „Црвена ружа“ што се истакнува со своите бурлескни настапи, особено со еден од 2015 година кога на погреб во провинцијата Хебеи танчарките го завршија традиционалниот кинески танц со не така традиционално соблекување на облеката.
Шефицата на оваа група позната како Ли помина 15 дена во притвор, а мораше да плати и парична казна од 70.000 јуани (11.300 долари).