По повеќе од две децении, твитерџиите „ископаа“ едно заборавено интервју со Џенифер Анистон во шоуто на Дејвид Летерман, за кое корисниците на социјалната мрежа се едногласни дека е едно од најбизарните и најодвратните интервјуа воопшто.
Причината зошто интервјуто беше извадено „од нафталин“ е дискусијата што се отвори по објавувањето на документарниот филм „Framing Britney Spears“, на почетокот на месецов, што го крена на нозе целиот шоубизнис свет.
Освен што прикажува како медиумите, а и некои од главните актери во настаните, манипулирале со раскинувањето на врската на поп-пејачите Бритни Спирс и Џастин Тимберлејк, претставувајќи ја пејачката во негативно светло и нарушувајќи ја нејзината кариера, филмот укажува на многу поголем проблем во забавната индустрија - дека жените се третирани многу полошо од нивните машки колеги.
Во духот на посочување на проблемот што самиот Тимберлејк го призна, последните недели „испливаа“ разни интервјуа со бројни други пејачки и актерки, а едно од последните е гостувањето на сега 52-годишната Анистон во шоуто на Летерман во 1998 година.
Ѕвездата на серијата „Friends“ беше гостинка во шоуто на американскиот водител, сега 73-годишниот Летерман. Иако од тогаш поминаа повеќе од две децении, многумина сметаат дека тоа интервју е едно од најбизарните досега.
Имено, гостувањето, кое требаше да послужи како промоција на новиот филм на актерката - „The Object of My Affection“ - за само неколку минути се претвори во вистински хорор, покажувајќи го, благо речено, непочитувањето на водителот кон актерката.
„Извини ако ова е безобразно, ама морам да пробам нешто“, ја прекинува Летерман актерката среде интервју, а потоа ѝ приоѓа, ја фаќа за врат и ѝ го врти лицето кон него, како во позиција за бакнеж. Видно збунетата Анистон, тогаш 29-годишна, веднаш се обидува да се оттргне и да го прекине Летерман (тогаш 51-годишен) во бизарниот потег, па водителот на крај зема прамен од нејзината коса и го држи во уста.
На снимката јасно се гледа колку ѝ е неудобно на Анистон, додека во шок и со видно гадење ја брише плунката на водителот од праменот коса.
„Ова е толку ниско“, „Одвратно е“, „Никогаш не би му направил вакво нешто на маж“, „Бизарно е и одвратно, ми се гади“ се само дел од коментарите на ова заборавено интервју што кружи повторно на социјалните мрежи.
Покрај интервјуто со Анистон, Летерман во текот на неговата долга кариера како водител покажувал непочитување кон гостите и користејќи ја својата позиција како влијателен маж ги понижувал жените прикажувајќи се како супериорен во однос на нив.