Врховниот суд на САД го блокираше планот на претседателот Џо Бајден за задолжителни вакцини или редовни тестирања за вработените во големите компании, но дозволува неговата администрација да наметне посебни услови за здравствените установи финансирани од федералните власти.
Судот пресуди откако ги сослуша аргументите во правната битка за привремените наредби издадени од две федерални агенции во ноември за зголемување на вакцинирањето на работните места во големите компании во кои се вклучени 80 милиони американски работници и федералните здравствени установи.
Судот беше поделен
Судот, кој има конзервативно мнозинство, беше поделен и во двата случаи. Во првиот случај, шест судии гласаа за блокирање на наредбите за задолжителни вакцини или тестирање на работното место, а во вториот случај, пет судии ја поддржаа заложбата за здравствените работници, додека четворица беа против.
На либералното мнозинство во вториот случај му се придружија двајцата конзервативни судии, Џон Робертс и Брет Кавано. Обврската опфаќа 10,3 милиони работници во 76.000 федерални здравствени установи.
Претседателот Бајден во септември ги претстави регулативите за зголемување на стапките на вакцинација за возрасни како начин за борба против пандемијата, која уби повеќе од 845.000 Американци и ја оптовари економијата.