Германскиот производител на автомобили BMW ја повика владата да гласа против дополнителните царини што Европската Унија сака да ги воведе за кинеските електрични возила. Ова им се придружува на другите германски производители на автомобили кои не сакаат компликации на нивниот најважен пазар, пренесува Bloomberg.
И Mercedes-Benz го изрази своето противење на зголемувањето на тарифите за увоз на кинески електрични автомобили. Како и BMW, тие се убедени дека продажбата на нивниот најголем пазар може да биде загрозена доколку Кина возврати со контрамерки.
Извршниот директор на Mercedes-Benz, Ола Калениус, се залага за отворен пазар во последните месеци. Првиот човек на Volkswagen, Оливер Блуме, исто така постојано изразува загриженост за потенцијалните трговски спорови со Кина, пренесува Forbes.
„Дополнителните царини им штетат на германските компании кои имаат глобален пазар. Тоа може да предизвика и трговски спор од кој никој нема да има корист. Затоа, германската влада треба да заземе јасна позиција“, рече извршниот директор на BMW, Оливер Ципсе.
Денеска земјите-членки на Европската Унија ќе гласаат за воведување дополнителни царини за увоз на електрични автомобили од Кина. Тие би можеле да достигнат до 45 проценти. Доколку членовите сакаа да спречат воведување дополнителни тарифи, за тоа ќе им требаше квалификувано мнозинство. Затоа, 15 земји-членки би морале да гласаат против.
Во вторникот во Берлин беше објавено дека германската влада има намера да се воздржи од гласањето. Се очекува неколку членки да се воздржат од гласање, што би можело да спречи воведување нови тарифи, пишува Bloomberg.
Да потсетиме, Европската комисија предложи дополнителни тарифи откако истрагата покажа дека Кина во голема мера го субвенционира производството на електрични возила. Ова ги прави европските производители неконкурентни во однос на цената и го презема нивниот дел од пазарот.
Германија веќе изрази надеж дека ќе се постигне решение во преговорите меѓу ЕУ и Кина, а тоа го потврди и на средбата меѓу германскиот канцелар Олаф Шолц и францускиот претседател Емануел Макрон одржана во средата во Берлин.
Шолц нагласи дека се залага за продолжување на дијалогот со кинеската влада бидејќи воведувањето тарифи може да има штетен ефект врз европската автомобилска индустрија. Сепак, неговиот француски колега не се согласува со таквиот став. Тој ја поддржува намерата на Европската комисија да го заштити европското производство со царини бидејќи Кинезите имаат одредена предност на пазарот, пренесува France24.
