Премиерата на новиот модел закажана за во петок 15 јуни, за жал имаше трагична увертира претходниот викенд во Германија.
Во несреќата на постпродукциското возило на BMW Серија 8, која се случи во саботата навечер во близина на Боденкирхен, почина 53-годишна жена, додека 37-годишниот возач помина само со полесни повреди.
Како што пренесува „Motor1“, неименуван возач од Минхен ја возел мајката на својата девојка во пробно возило на BMW Серија 8, за да и го покаже новиот модел кој се уште не е официјално претставен.
Поради големата брзина тој загуби контрола над автомобилот и излета од патот, а потоа возилото удри во неколку стебла.
Иако воздушните перничиња се активирале, поради јачината на ударот, жената доживеа тешки повреди на главата и почина на местото на настанот.
Како резултат на големите деформации на каросеријата, пожарникарите беа принудени да употребат хидраулична метална направа за да го извлечат мртвото тело на жената.
Истрагата околу сите околности кои доведоа до оваа несреќа е во тек, а во прелиминарниот извештај како главен причинител за сообраќајката се пренесува прекумерната брзина.
Се верува дека постпродукциското возило било моделот M850i xDrive, опремен со V8 мотор со 533 коњски сили, за кој се претпоставува дека од 0 до 100 километри на час забрзува за помалку од 4 секунди.
Официјалната премиера на BMW Серија 8 треба да се случи на 15 јуни во рамките на трката 24 часа Ле Ман.