Звонимир Бобан (55), поранешен капитен на хрватската фудбалска репрезентација и Динамо, а подоцна и близок соработник на претседателот на УЕФА, Александар Чеферин, даде интервју за Gazzetta Dello Sport.
Тој меѓу другото ја коментираше и ситуацијата во Милан, клубот во кој го помина најдобриот дел од својата играчка кариера и беше спортски директор во 2019 и 2020 година.
Бобан рече дека го почитува тренерот Пауло Фонсека, кој го презеде Милан ова лето, но верува дека италијанскиот тим мора да игра во формација 4-3-3. Тој зборуваше и за Златан Ибрахимовиќ, некогаш голем напаѓач кој минатата година ја заврши кариерата, а сега работи во Милано како специјален советник за спортски прашања.
„Златан е генијалец и ќе му бидам благодарен до крајот на мојот живот бидејќи од љубов кон Милан се согласи да се врати и со тоа ја промени поновата историја на клубот. Но, сега не ми е јасно што прави во Милан и кои се неговите задачи за да можам да го оценам. Се надевам дека ги разбра бидејќи на крајот ќе му судат нему, а не на спортскиот директор Џефри Монкада“, изјави Бобан кој ја критикуваше трансфер политиката на Милан.
„Тимот кој ја освои Серија А и беше полуфиналист во Лигата на шампионите беше невнимателно разбиен. Толку многу можеше да се изгради на тие темели. За мене тоа беше очигледна грешка“, изјави Бобан.
Според податоците на Transfermarkt, Ибрахимовиќ одиграл 163 натпревари за Милан во кои постигнал 93 гола и асистираше на 34 од нив.
