Американскиот авиопроизводител Boeing уште е силен конкурент на европскиот Airbus, иако се соочува со една од најголемите кризи во своето постоење.
По двете фатални авионски несреќи во пет месеци, бестселерот на компанијата, Boeing 737 Max, пред две недели беше приземјен ширум светот.
Кина завчера склучи бомбастичен договор за 300 патнички авиони со ривалот Airbus, што беше голем пораз за Boeing.
Моделот 737 Max е во директна конкуренција со A320 на Аirbus. Кина нарача 290 вакви авиони од европскиот производител.
Но, Boeing и неговиот 737 Max сепак ќе поминат добро на крај. Повеќето експерти претпоставуваат дека 737 Max ќе се врати на нормалната побарувачка откако Boeing ќе понуди ажурирање на софтверот во следниве неколку недели. Boeing смета дека ќе ги поправи проблемите со автоматскиот систем за безбедност што е во фокусот на истрагите за двете авионски несреќи.
Лани Boeing имаше 675 нето нарачки за авиони 737 Max и додаде 13 нови клиенти за авионот. Со тоа ја надмина бројката од 541 нето нарачка за различните верзии на Airbus A320. Меѓутоа Airbus има вкупно 6.000 нарачки за A320, а Boeing околу 5.000 за 737.
Двете авиокомпании се во „мртва трка“ за тронот, но истовремено се и единствените кандидати.
Треба да се има предвид дека кога една авиокомпанија ќе го направи изборот на типот на авиони што ќе го користи, не е лесно да се префрли на друг производител. Обуката за пилотите, одржувањето и набавката на резервни делови за авионите ќе бидат многу поскапи за авиокомпаниите ако го прават тоа за два различни производители или ако направат пресврт кон друга компанија.