Компанијата Boeing го одложи тест лансирањето на Starliner капсулата за астронаути. Одлуката е донесена поради технички проблем што се појави по невреме пред неколку дена.
Тимовите задолжени за мисијата се обидоа да откријат дали проблемите може да се решат на време за да биде Starliner лансиран денеска, но таа можност е отфрлена.
„Ќе оставиме податоците да ја водат нашата работа. Тимот вредно работи за да биде мисијата безбедна и успешна. Лансирањето нема да биде извршено додека нашата капсула не функционира оптимално, а нашите тимови бидат сигурни дека се подготвени за лет“, изјави менаџерот Џон Волмер.
Во текот на рутински преглед ден пред лансирањето на Starliner, инженерите забележаа дека позициите на некои вентили во погонскиот систем се променети и тоа по бурата во регионот на Вселенскиот центар Кенеди.
Затоа, Starliner засега ќе биде вратен на дополнителни проверки. Целта на Starliner е лет до Меѓународната вселенска станица без екипаж, да се спои и да остане споен 10 дена, а потоа да се врати на Земјата.