Американскиот производител на авиони Boeing соопшти дека не примил ниту една нова нарачка во јануари, сигнализирајќи ги деловните проблеми во очекување на решавање на кризата со 737 MAX.
Европскиот Airbus во јануари доби нарачки за 274 комерцијални авиони.
Boeing испорача само 13 авиони на своите клиенти во првиот месец, вклучително и шест од типот 787 Dreamliner.
Компанијата минатата година првпат по повеќе децении имаше повеќе откажани нарачки и барања за преправки на авионите отколку нарачки за нови авиони. Клиентите избегнуваат да нарачуваат нови авиони сè додека 737 MAX не добие дозвола од регулаторот за враќање во промет.
Авионите од овој тип беа приземјени во март минатата година по две тешки несреќи во кои настрадаа вкупно 346 луѓе.
По повеќекратни одлагања, Boeing најави враќање на 737 MAX кон средината на оваа година.
Компанијата проценува дека вкупните загуби изнесуваат преку 18 милијарди долари.
