Богатството на основачот на Facebook, Марк Закерберг, порасна на 100 милијарди долари откако социјалната мрежа понуди нова услуга на кратки видеа, пренесе BBC.
Компанијата пред два дена го претстави Instagram Reels, конкурент на контроверзната кинеска апликација TikTok.
Акциите на Facebook вчера рипнаа за повеќе од 6 проценти. Со ова Закерберг стана дел од клубот на супербогати луѓе со имот од над 100 милијарди долари како Џеф Безос и Бил Гејтс. Шефовите на Amazon и Microsoft го зголемија нивното богатство во последно време.
Во време на пандемијата со COVID-19 токму Facebook, Amazon, Apple и Google се меѓу најголемите добитници бидејќи сè повеќе луѓе купуваат, се забавуваат и се дружат преку интернет. Богатството на Закерберг порасна за повеќе од 22 милијарди долари годинава, а на Безос повеќе од 75 милијарди, пренесе Bloomberg.
