Финалето на престижниот јужноамерикански куп Копа Либертадорес ќе биде полето за битка помеѓу лутите аргентински ривали Бока Јуниорс и Ривер Плејт. Поради тоа што секој нивен натпревар е полн со жестока игра на теренот и немири на трибините, двата натпревари од финалето ќе се играат без гостински навивачи.
Оваа одлука ја донесоа претставниците на двата клуба само неколку дена откако аргентинскиот претседател Маурисио Макри изјави дека ќе дозволи присуство на гостински навивачи.
Пред само неколку дена Макри изјави дека финалето на Копа Либертадорес е шанса за Аргентина да покаже дека фудбалот може да се игра без нереди предизвикани од навивачите. Неговата изјава се коси со правилата на аргентинската фудбалска федерација, која во 2013 година им забрани на гостинските навивачи да присуствуваат на натпреварите од аргентинските натпреварувања, со цел да се намали насилството на стадионите.
Оваа година за првпат во историјата на финалињата на Копа Либертадорес ќе играат два аргентински клубови. Се работи за најелитното натпреварување во Јужна Америка, односно пандан на европската Лига на шампиони.
Првиот натпревар ќе се одигра на 10 ноември на стадионот на Бока Јуниорс наречен Бомбониера, додека возвратниот натпревар ќе се одигра на 24 ноември на стадионот Монументал Антонио Веспучи Либерти, каде домашните натпревари ги игра тимот на Ривер Плејт.
Последниот триумф на Бока Јуниорс во Копа Либертадорес се случи во 2007 година. Доколку победи, тоа ќе биде седма титула на Бока во ова натпреварување и со тоа ќе се изедначи со аргентинскиот ривал Индепендиенте. Ако Ривер Плејт го освои финалето, тоа ќе биде негова четврта титула во истото натпреварување.