Македонија

Боки 13 се сомничи за примање награда за незаконито дејство и за перење пари

15. јули 2019 - 17:49 | Кајгана

Сопственикот на 1тв Бојан Јовановски денеска беше задржан на граничен премин, на барање на Јавното обвинителство.

На денешната прес-конференција закажана во ЈОРМ по објавувањето на веста за задржувањето, обвинителката за организиран криминал Вилма Рускоска соопшти дека Бојан Јовановски – Боки 13 и Зоран Милевски – Кичеец се сомничат дека зеле 1,5 милиони евра за да влијаат врз јавен обвинител и да ја олеснат положбата на лице кое е под истрага.

Притоа, двајцата се сомничат за кривично дело „Примање награда за противзаконито влијание“, а Јовановски исто така се сомничи и за кривично дело „Перење пари“.

Првоосомничениот наводно го искористил своето влијание кај јавен обвинител, а второосомничениот овозможувал средби со лице под истрага, кое во оваа истрага е сведок.

Првично, осомничените побарале 8 милиони евра од сведокот за да извршат влијание да се запре кривична постапка против него. Откако добиле 1,5 милиони евра, тие се посомневале во доверливоста на лицето и престанале да се сретнуваат со него.

За двајцата осомничени е поднесено барање за определување мерка притвор.

Јавниот обвинител на Република Северна Македонија Љубомир Јовески рече дека ако има и други лица подложени на вакви дејствија да пријават во Обвинителството.

Коментирај