Во голема сенка на Европското првенство пред неколку дена почна првенството на Јужна и Средна Америка каде уште на стартот еден резултат го обиколи светот.
Боливија дефинитивно не е земја на ракометот. Не само што не е, туку играат до степен човек да се запраша зошто се мачат.
Во вторникот во 1. коло од Групата А на континенталниот собир во Бразил боливиските ракометари се сретнаа со актуелниот шампион Аргентина и доживеаја дебакл во буквална смисла на зборот. На полувреме Аргентинците постигнаа 36 гола наспроти само 5 на Боливија, а на крајот на семафорот стоеше 70:8, што значи дека Боливијците дале едвај 3 гола во вторите половина час игра.
Ден подоцна беа нешто подобри бидејќи од Уругвај загубија „само“ со 42:9.
Не е прв пат Боливија да загуби со ваков екстремен резултат. На јужноамериканските ракометни вљубеници резултатите на репрезентацијата на Боливија им се добро познати. На првенството пред две години исто така бележеа слични порази: 7:82 од Аргентина, 9:77 од Бразил, 8:51 од Парагвај, 7:53 од Чиле и, замислете, 1:55 од Уругвај! Да, за цел час игра постигнале само 1 единствен гол.
Веројатно се прашувате како ваква репрезентација се нашла на завршница на континентално натпреварување.
Одговорот е едноставен: Откако Панамериканското првенство се подели на два дела, односно на Првенство на Северна Америка и Карибите и на Првенство на Јужна и Средна Америка, сите јужноамерикански репрезентации имаат право на учество без квалификации - со покана. Колку за информација, Боливија претходно никогаш се немаше квалификувано на заедничкото Панамериканско првенство.
Е сега, веројатно ќе се запрапшате и дали овие момци некогаш успеале некого да победат.
Па да, успеале! Последната победа на Боливија која успеавме да ја „ископаме“ е од октомври 2018 година и тоа со високи 38:21 над Панама во она што е разигрување за избегнување на дното на табелата. Се работи за Првенство на Јужна и Централна Америка за ракометни земји во развој организирано од ИХФ. Боливија завршила 10-та од 11 учеснички - само пред Панама.
Таа победа е на официјален натпревар. Можеби имаат некоја понова на пријателска, но тоа е тешко да се пронајде, а и не е ни важно штом не е официјален натпревар во прашање.
Доколку се прашувате како изгледа еден натпревар на Боливија, и на тоа имаме одговор. Нивниот дуел со Аргентина го има на YouTube и тоа цел натпревар. Па, уживајте!
