Градската општа болница „8 Септември“ во Скопје има долг од 5 милиони евра, или околу 243 милиони денари, соопшти новиот директор Христијан Костов, кој на денешната прес-конференција информираше во каква состојба ја затекнал болницата , откако тој стапил на функцијата.
„Долгот е кон разни фирми и останати долгови од разни неплатени сметки, режиски торошоци и казнени камати од некои тужбени барања“, изјави Костов.
Тој додаде дека во делови од болницата не се направени никакви поправки подолго време, или поточно 46 години , од пуштањето на болницата во 1971 година. Најитно според Костов е интервенција на операционите сали.
„Со ова темпо на работа на болницата, во догледно време нема да бидат функционални. Треба да се има предвид дека на годишно ниво во ГОБ се изведуват 6-7 илјади оперативни интервенции. Освен оперативниот блок и одделот за интензивно лекување и другите сегменти, како абулантските простории треба да се обноват. Тука се опслужуваат годишно околу 250 илјади пациенти“, рече Костов.
Костов најави дека има два приоритети во својата работа – реконструкција на оперативниот блок и единицата за реанимација, бидејќи таму операциите се одвивале во како што кажа субстандардни услови, и воспоставување воздушен транспорт е вториот приоритет, односно превезувањето на пациентити со хеликоптер, што според него, ќе го скрати времето на превезување на пациентот од целата држава до болницата, што е клучно, како што рече Костов, во одредени случаи за намалување на морталитетот и зголемување на безбедноста и сигурноста на пациентите.