Француската полиција дури сега извести дека во саботата, во близина на стадионот „Паркот на принцовите“ во Париз, била пронајдена бомба и тоа само неколку часа воочи натпреварот Парис Сен Жермен – Бордо, кој го следеле околу 50,000 луѓе.
Жител на улицата во близина на стадионот во саботата околу пет часот наутро пронашол сомнителен предмет и веднаш ја известил полицијата.
Полицијата потврди дека пронашла импровизирана експлозивна направа.
Полицијата ја деактивирала бомбата која била рачно изработена, но деталите од операцијата биле чувани во тајност до денес, бидејќи антитерористичката полиција вршела истрага во овој дел на Париз, барајќи ги лицата поврзани со овој напад.
Уапсени се пет лица, за кои се сомнева дека подготвувале терористички напад. Меѓу нив е и радикален исламист поврзан со исламистичкото движење, кој бил под полициски надзор.
„Осомничениот бил под надзор, но најверојатно ангажирал лице кое личи на него и на тој начин ги затворал агентите кои го следеле“, истакнал францускиот министер за внатрешни работи Жерар Коломб.
Сите осомничени се наоѓаат во притвор.
Натпреварот Парис Сен Жермен – Бордо во саботата го следеле околу 50,000 луѓе.
Стадионите во Париз веќе беа мета на терористички напади.
Во неколку одвоени терористички напади на 13 ноември 2015 година во Париз, во кои починаа околу 130 луѓе, а повеќе од десетина беа повредени, една од метите беше стадионот „Франција“.
