Бон Џови наговорил непозната жена да не се фрли од мост

Џон Бон Џови убедил непозната жена која стоела на раб на пешачки мост во Нешвил да не скокне од мостот.

Полициската управа во Нешвил споделила снимка од пејачот и неговата екипа кои биле на пешачкиот мост „Џон Сигенталер“ кога една жена се обидела да скокне од мостот.

Полицијата соопшти дека инцидентот се случил во вторникот на пешачкиот мост „Сигенталер“, кој се протега на реката Камберленд. Во тој момент, Бон Џови снимал музичко видео на мостот што останал отворен за јавноста за време на снимањето.

На видеото објавено на Х се гледа како асистентот на Бон Џови разговара со жена. Пејачот ѝ мавнал со рака на жената и се вклучил во разговорот.

На крајот жената се свртела кон нив, а тие ѝ помогнале да премине преку оградата и да се спаси. Бон Џови зборувал со жената и ја прегрнал.

Неколку минути подоцна, на полициските снимки се гледа како Бон Џови заминува од мостот со жената.