Дефанзивецот на Италија упати низа пофалби кон вечерашниот противник оквалификувајќи ја репрезентацијата на Австрија како подобар тим од Турција, Швајцарија и Велс.
„Имаме најголема почит кон Австрија, располагаат со свежина во играта и физички се способни да одиграат добар натпревар“, почна Леонардо Бонучи на официјалната прес-конференција.
Италија и Австрија играат вечер од 21 часот на „Вембли“ во Лондон. „Аѕурите“ важат за големи фаворити и се очекува да излезат како победници и да продолжат во четвртфиналето бидејќи се и меѓу кандидатите за пехарот. Но, тоа ќе мора да го докажат на теренот.
„Ние сме самоуверени, дури и да не можеме да го насочиме нашето целосно внимание кон некого. Со Австријците мора да бидеме многу внимателни во однос на деталите, ќе ја почитуваме Австрија, но мора да ја играме нашата игра“, додаде Бонучи кој во репрезентацијата доаѓа од редовите на Јувентус.
Италија во групата А оствари перфектен скор од три победи и без примен гол. Турција и Швајцарија ги победи со по 3:0, додека над Велс славеше со минимални 1:0, но на тој натпревар селекторот Роберто Манчини настапи со комбиниран состав, одмарајќи дел од првотимците.
„Австријците се подобри од трите репрезентации со кои се соочивме досега: тие имаат германски начин на игра, агресивни се и напаѓаат со контри, држат високо темпо, прават висок пресинг. Тие се ниво над останатите“, рече тој.
„Ние никогаш не сме рекле дека се чувствуваме супериорни во однос на било кого. Веруваме во патот кој го одбравме со тренерот Манчини, а резултатите го покажуваат тоа, но доколку го спуштиме фокусот и желбата за пожртвуваност, тогаш ќе станеме обична репрезентација. Клучно е да бидеме целина“, заврши Бонучи.
