Тепачката што се случи по крајот на мечот за титулата помеѓу Хабиб Нурмагомедов и Конор МекГрегор остави црна трага на вечерта, која инаку беше празник за љубителите на боречки спортови. УФЦ борачот Зубаира Тукугов на Instagram се пофали дека го удрил МекГрегор по крајот на мечот.
Еден од тимските колеги на УФЦ шампионот Хабиб Нурмагомедов на социјалните мрежи се пофали дека го нападнал Конор МекГрегор во тепачката која настана по крајот на УФЦ 229.
УФЦ борачот во перо-лесна категорија, Зубаира Тукугов, на Instagram објави видео во кое не само што признава дека намерно влетал во рингот, туку и вели дека тоа го направил со намера и план да го нападне Ирецот.
„Го удрив, како што ветив дека ќе направам. Ветив дека ќе го натерам да преземе одговорност за неговите зборови и токму тоа го направив“, вели Тукугов во видеото.
„Кажете ми каде мислите дека бев удрен. Никаде. Само еден полицаец ме одбутна, како што се гледа на видеото, но не бев удрен никаде“, вели тој.
Тукугов е член на УФЦ тимот на натпреварувачи во перо-лесна категорија, но нема влезено во рингот како натпреварувач од УФЦ 198 во 2016 година, кога изгуби од Ренато Моикано. Тој требаше да се натпреварува на 10 декември 2016 година, но откако не ги помина допинг тестовите, беше суспендиран на две години.
Борачот роден во Чеченија требаше да се сретне во рингот со тимскиот колега на МекГрегор, Артем Лобов, при крајот на овој месец. Поради вмешувањето на Тукугов во тепачката по вчерашниот меч, тој скоро сигурно нема да влезе во рингот како натпреварувач, а можеби ќе добие и нова суспензија.