Долгоочекуваната борба помеѓу Мајк Тајсон и Џејк Пол, закажана за 15 ноември, би можело да биде одложена само еден ден пред да влезат во рингот.
Имено, 58-годишниот Тајсон ден пред борбата со 31-годишниот помлад Пол ќе мора да оди на лекарски прегледи, а по неодамнешната изјава на Ајрон Мајк тие нема да бидат рутински туку многу детални.
Медицинскиот тим на Одделот за лиценцирање и регулација во Тексас (TDLR) објави дека Тајсон ќе биде подложен на темелно испитување 24 часа пред борбата, откако неодамна изјави дека „речиси умрел“ на почетокот на оваа година.
Тајсон откри дека почнал да повраќа крв на летот од Мајами до Лос Анџелес во мај, и дека по слетувањето веднаш бил префрлен во болница, а поради неговата состојба е одложена борбата против Пол која била закажана за јули.
„Повраќав крв, а лекарите не ја исклучија можноста за смрт. Се покажа дека имам чир од 7 сантиметри. Само сакав да излезам од болница, не сакам да умрам во болнички кревет, туку во рингот“, изјави Тајсон и ги загрижи фановите, но и организаторите на борбата.
За потсетување, Тајсон и Пол треба да се соочат на 15 ноември во американскиот Арлингтон по осум рунди од по две минути, наместо стандардните триминутни рунди карактеристични за машките професионални натпревари и ќе носат ракавици од 14 унци, кои се малку поголеми од стандардните што ги гледаме на натпреварите во професионалниот бокс.
А дали ќе се борат ќе знаеме на 14 ноември по конечната одлука на TDLR.
