Високиот комесар на ЕУ за надворешна и безбедносна политика Жузеп Борељ синоќа изјави дека ЕУ не е во состојба да посредува во израелско-палестинскиот конфликт.
– Повикавме да се стави крај на конфликтот, но кој може да изврши притисок врз Израел? Само САД. Европа веќе подолг период не е способна за тоа, рече Борељ во Мадрид, каде зборуваше во Институтот „Реал Елкано“ за неговата нова книга „Европската надворешна политика во време на COVID-19“.
– САД се единствената земја што може да стави крај на овој конфликт, се разбира, ако сака, рече Борељ, поранешен министер за надворешни работи на Шпанија.
Претходно, американскиот претседател Џо Бајден ја оправда интервенцијата на Израел во која од понеделникот се убиени 103 Палестинци, од кои 27 деца. Во исто време, седуммина Израелци беа убиени од ракетен напад на Хамас од Појасот Газа.
– Овој конфликт на Блискиот исток не е ништо ново, но светот гледа настрана, оцени Борељ.
Израел ја отфрли надлежноста на Меѓународниот кривичен суд и одбива истрага за воени злосторства, ниту го признава повикот на Обединетите нации да го запрат ширењето на окупацијата со градење дополнителни еврејски населби. Иселувањето на Палестинците од нивната земја и куќи во источен Ерусалим минатиот петок доведе до последниот бран насилства.