Борусија Дортмунд одлично ја почна сезоната во домашната лига, но потоа направи неколку киксови, со што се симна од врвот на табелата. Тие, заедно со Јувентус, во јануари ќе тргнат по потписот на играч од средниот ред, а на самиот врв на листата се наоѓа играч на Ливерпул.
Емре Чан има останато само уште 6 месеци на неговиот договор со Ливерпул, и бара огромна плата од англискиот тим за да остане на „Енфилд“.
Чан стана еден од клучните играчи на Ливерпул и Јирген Клоп неколкупати изјави дека приоритет на тимот е да најдат заеднички јазик со германскиот интернационалец за тој да потпише нов договор. Но, Емре Чан бара плата од 150.000 фунти неделно а англискиот тим во моментот не е спремен да го награди со толку скап договор.
Јувентус веќе подолго време е заинтересиран за услугите на Германецот, а сега во борбата за неговиот потпис се приклучи и тимот на Борусија Дортмунд. „Милионерите“ од Дортмунд оваа сезона немаат цврстина и дефанзивна сигурност во средината, па се надеваат дека Чан би можел да им ги реши токму овие проблеми.
Во јануари цената на Емре Чан би требало да биде многу помала, а веројатно и Ливерпул ќе биде спремен да го продаде за да не го изгуби беспари откако ќе му заврши договорот.
Претходно и Манчестер Сити покажа интерес за Чан, но засега изгледа дека Борусија Дортмунд и Јувентус изгледаат како најсериозни кандидати за потпис на Германецот.