Поранешниот селектор на репрезентациите на Југославија и Србија, Радмило Арменулиќ, ја коментираше моменталната форма на најдобриот светски тенисер Новак Ѓоковиќ.
Прославениот 82-годишен тренер истакна дека Ѓоковиќ е помалку физички подготвен за разлика од претходните години и дека виновни за тоа се пирамидите во Високо.
„Новак е помалку физички подготвен во споредба со пред година-две. Паузираше премногу, што не е добро. Отиде во Босна, ги гледаше 'пирамидите'... тоа не му требаше. Натпреварите се вистинска подготовка и се надевам дека полека се враќа во форма“, изјави Арменулиќ во интервју за Kurir.
Арменулиќ 17 години беше селектор на Дејвис куп репрезентацијата на Југославија, а еден од неговите играчи, Горан Иванишевиќ, сега го тренира Ѓоковиќ наместо Марјан Вајда. Тоа го коментираше и Арменулиќ.
„Мислам дека на Новак му недостига Вајда. Новак постигна подобри резултати со него, беше психички постабилен. Иванишевиќ е нов тренер, нема искуство... Може да дава совети, но Вајда беше поконкретен, убедлив, поблизок... Некако со Ноле имаше семејна врска, а тоа многу му значеше на Ѓоковиќ бидејќи е емотивен“, додаде Арменулиќ.