Кошаркарите на Босна и Херцеговина попладнево загубија од Литванија и со тоа дефинитивно не успеаја да ја минат фазата по групи иако го приредија најголемото изненадување на турнирот - победа над актуелниот шампион Словенија.
Откако првата четвртина заврши со неверојатни 28:28, Литванците потоа лесно направија разлика кога до крајот успешно ја одржуваа и запишаа победа од 87:70. Бидејќи ова практично беше директен дуел за тоа кој ќе го освои последното место од групата Б кое води во нокаут-фазата, Литванците на крајот се радуваа, а Босанците се пакуваат.
Најефикасен на паркетот беше Џанан Муса со 22 поена, но него го пратеше единствено НБА играчот Јусуф Нуркиќ со 15 поени, додека никој друг од босанскиот табор не постигна двоцифрен број на поени. Затоа, пак, шестмина Литванци имаа над 10 поени, а Јонас Валанчиунас запиша дабл-дабл со 13 поени и 15 скокови.
Во 3. коло Босна и Херцеговина го приреди шокот на првенството кога успеа со 97:93 да ја совлада фаворизираната Словенија предводена од Лука Дончиќ, која е и актуелен европски шампион и еден од трите главни фаворити за пехарот годинава.
Популарните „Змајеви“ иако испаднаа, приредија одлична забава за љубителите на кошарката, а победата над првакот Словенија и натаму ќе одѕвонува како едно од најголемите изненадувања.
Од групата Б денеска се играат и последните два натпревара, кои ќе бидат само за пласман бидејќи покрај Литванија во осминафиналето сигурни се и Германија, Словенија и Франција. Досега познато е само дека Литванија ќе игра против Шпанија.
