Бостон сезонава растура на гости: Паѓа ли рекордот на легендарните Булс од 1995?

Бостон Селтикс синоќа го совлада Мемфис Гризлис со 117:103, соборувајќи го 50-годишниот рекорд на франшизата за последователни победи на гости. Актуелниот НБА шампион го забележа шестиот триумф во низа, а до славјето во „Федекс Форум“ ги предводеа Ал Хорфорд (26 поени) и Џејсон Тејтум (25 поени).

Бостон во претходниот период оствари гостински победи против Јута Џез, Портланд Треил Блејзерс, Сакраменто Кингс, Феникс Санс, Сан Антонио Спарс и сега Мемфис Гризлис, соборувајќи го рекордот на франшизата поставен во 1973 година, кој исто така го надмина успехот од сезоната 1974/1975 кога Селтикс ја завршија натпреварувачката година со 31 победа на гостувањата. Годинава тие веќе ја надминаа таа бројка (32), а ќе имаат шанса да го зголемат рекордот на уште два натпревара сезонава (против Орландо Меџик и Њујорк Никс).

Единствени пред нив (засега) се Голден Стејт Вориорс со 34 победи на гости во таа позната „сезона 73-9“ во 2016 година, како и легендарниот тим на Чикаго Булс, кој во ерата на Мајкл Џордан постигна 33 победи на гости во сезоната 1995/1996. Нивниот рекорд е исто така на праг на рушење доколку Бостон до крајот на сезоната оствари победи против Орландо и Никс (9 и 10 април).

„Одиме во вистинската насока во вистинско време. Се надеваме дека сите ќе се вратат здрави до почетокот на плејофот за да можеме да продолжиме со нашиот план. Речиси е време за војна“, рече инспирираниот Џејсон Тејтум по натпреварот додека го чека враќањето на Џејлен Брансон.

Бостон моментално е на второто место на Истокот со 54 победи и 19 порази, без шанси да го надмине Кливленд Кавалирс (60-15) на врвот на конференцијата, додека Њујорк фатално заостанува на третото место со речиси девет победи помалку од Селтикс.