Постои можност играчот од средниот ред на Фиорентина, Едоардо Бове, никогаш повеќе да не заигра фудбал, тврди еден од најстарите италијански весници, фирентинскиот La Nazione.
Бове колабираше во 17-тата минута на натпреварот Фиорентина - Интер. Брзата интервенција на лекарите му го спаси животот.
La Nazione објави дека 22-годишникот бил префрлен од одделот за интензивна нега на кардиологија и дека ќе биде спроведена нова рунда тестови за да се утврди дијагнозата.
Доколку наодите покажат дека срцевиот удар е предизвикан од неправилна форма на срцето, ќе му биде вграден кардиовертер дефибрилатор (ICD, уред сличен на пејсмејкер), што би значело дека нема да може да игра фудбал, барем не во Италија.
Причината се упатствата за спортска медицина и кардиологија во таа земја, во кои е забрането учество на спортски натпревари за оние кои имаат вградено модификации на срцето.
Таков проблем имаше данскиот репрезентативец Кристијан Ериксен кој беше играч на Интер кога преживеа срцев удар на ЕУРО 2020. Му беше вградено апаратче по што му се врати на фудбалот, но само откако ја напушти Чизмата. Денес игра за Манчестер Јунајтед.
