Универзумот на „Breaking Bad“ постојано се проширува со нови проекти, серии и филмови. „Better Call Saul“ доби одлични критики, па тоа го мотивираше креаторот на оригиналното шоу да „ги засука ракавите“ и да поработи на долгометражен филм, кој беше најавен при крајот на минатата година.
Дали тоа значи дека Волтер Вајт се враќа од мртвите?
Брајан Кренстон, кој го толкуваше ликот на Валтер Вајт во серијата „Breaking Bad“, гостуваше во радио шоу и разговараше токму за серијата која му ја врати кариерата. Тој беше скоро заборавен по крајот на серијата „Malcolm in the Middle“ и неколку години не добиваше ниту филмски, ниту телевизиски улоги.
„Од реалистична гледна точка, ако некогаш бидам повикан да глумам во долгометражниот филм или во ‘Better Call Saul’ – што не знам дали ќе се случи – не би чекал ниту секунда туку веднаш би прифатил“, рече Кренстон.
Тој рече дека улогата во „Breaking Bad“ му го променила животот, како личниот така и професионалниот. Поради улогата на Волтер Вајт, тој добил шанси кои никогаш не ни помислил дека ќе ги добие.
Сепак, продуцентите на филмот и креаторот Винс Гилиган беа јасни околу долгометражниот филм – тој нема да биде фокусиран на Волтер Вајт. Иако тоа не значи дека нема да го видиме ликот на Хајзенберг, шансите за неговото појавување се многу мали.
