Постариот брат на Пол Погба го предупреди неговиот клуб дека доколку не го продаде сега ризикува да не оствари профит од него.
Французинот константно е поврзуван со заминување од „Олд Трафорд“, а неговиот договор со Манчестер Јунајтед е до јуни 2022 година. Пред некој месец самиот изјави дека голема желба му е да настапува за Реал Мадрид, па доколку Манчестер не му дозволи да си замине ризикува да го изгуби без ни цент профит откако ќе му заврши договорот.
Матијас Погба е негов постар брат, исто така фудбалер, но не толку успешен. Последно играше за шпанска Расинг Мурсија од каде си замина зимава, а е доста близок со Пол.
Говорејќи во шпанската ТВ емисија за фудбал „El Chiringuito de Jugones“ тој рече дека неговиот брат е среќен во моментов во Манчестер, но дека не покажал никакви индиции дека има намера да остане и по истекот на договорот.
„Тој е среќен, ја подобрува својата игра. Има уште една година од неговиот договор. Не знам дали ќе си оди сега или потоа, но она што можам да ви го кажам е дека ако Јунајтед сака да заработи пари, мора да го продаде сега. Тоа е јасно како ден. Ако не, ќе си замине за беспари бидејќи не сум слушнал ништо околу продолжување на договорот“, рече тој.
Погба настапува за Манчестер Јунајтед од летото 2016 година кога за 70 милиони евра дојде од редовите на Јувентус. Интересно, четири години претходно Јуве го донесе токму од Јунајтед и тоа бесплатно. Синоќа преседа на клупата додека неговите соиграчи го прегазија Саутемптон со 9:0.