Нејмар да Силва е една од најголемите ѕвезди во светскиот фудбал во моментот, но голем дел од фудбалските фанови често знаат да го критикуваат поради неговото однесување на теренот. На почетокот на СП 2018 беше мета на шеги за неговата фризура, додека сега главна тема е неговото постојано симулирање и „глумење“ на фаули.
Тој посебно го навлече гневот на себе по театралниот пад во мечот против Костарика, кога само ВАР технологијата помогна за да биде избегнат срамен пенал за Бразил.
Со однесување на Нејмар се шегуваат дури и неговите сонародници, иако тој е најмногу фаулираниот играч на целиот Мундијал. Статистиката вели дека тој бил фаулиран десетпати против Швајцарија, што е најмногу на еден натпревар на СП од 1996 година наваму.
По тој повод, еден бар во Рио де Жанеиро реши да го направи гледањето на првенството поинтересно, па одлучи дека ќе ги почести гостите кои го гледаат натпреварот таму со пиво секогаш кога Нејмар ќе падне на земја на „Откритје арена“ во Москва, на мечот против Србија.
Нејмар беше фаулиран четирипати, а падна на земја барем уште толку пати, што значи дека присутните во барот пиеја на сметка на куќата цела вечер.
Поради оваа новост барот Sir Walter Pub доби рекорден број на резервации. Бразилците се свесни дека Нејмар често сака да лежи на тревата, па затоа ги зафатија столчињата во овој бразилски бар пред мечот со Србија.
