Олимпискиот комитет на Бразил денеска испрати соопштение во кое се наведува дека ќе преземе одредени мерки против бразилската олимписка фудбалска репрезентација која освои злато во Токио, поради одбивањето на бразилските играчи да ја носат официјалната униформа за време на доделувањето на медалите во Токио.
„По завршувањето на Олимписките игри, Бразилскиот олимписки комитет ќе ги објави мерките што ќе се преземат за да се зачува олимпиското движење, нашите спонзори и другите спортисти“, се вели во соопштението.
Бразилскиот олимписки тим во Токио беше информиран пред почетокот на натпреварот дека сите бразилски спортисти ќе треба да носат официјална опрема, изработена од кинеската компанија Picksport. Но, фудбалерите носеа дресови на Nike и панталони Picksport на подиумот.
Тоа крена голема прашина во Бразил бидејќи другите спортисти се чувствуваа навредени, па бразилскиот пливач Бруно Фратус, бронзен медалист на 50 метри слободно, рече дека потегот на фудбалерите е „јасна порака дека тие не се чувствуваат како членови на Олимписки тим и дека не се многу заинтересирани за сето тоа“.