Австралија ја шокираше Аргентина, Мексико ја преслуша Франција, Египет ја сопре Шпанија, додека на победа се израдува домаќинот Јапонија.
Дербито на првиот ден од фудбалскиот турнир на Олимпијадата во Токио мина во знакот на пресметката помеѓу Бразил и Германија. Бразилците почнаа фуриозно и веќе по половина час игра имаа убедливо водство од 3:0 благодарение на хет-трикот на Ришарлисон. Пред паузата можеше да биде и 4:0, но Маркос Куња не успеа да реализира од белата точка откако герамнскиот голман Флориан Милер одбрани.
Во вториот дел Германија се врати во игра со голот на Надим Амири, но потоа Максимилиан Арнолд поради два жолти ги остави своите соиграчи со десетмина. И со играч помалку во 83. минута Германците дојдоа до 3:2 со погодокот на Рагнар Аче, но во судиското надополнување Паулињо ги постави конечните 4:2.
Фаворитот за златото Шпанија потклекна на првиот натпревар не успевајќи да дојде до планираните три бода против Египет кој оддолеа и се избори за 0:0.
Аргентина почна лошо шокирајќи ја својата фудбалска јавност откако загуби со 2:0 од аутсајдерот Австралија. Лахлан Велс во 14. минута го најави шокот, потоа Франсиско Ортега доби црвен картон, па на 10 минути пред крајот Марко Тилио го дуплираше водството.
Мексиканците со 4:1 ја декласираа Франција. Откако првиот дел заврши без голови Алексис Вега и Себастиан Кордова погодија за Мексико пред ветеранот Андре-Пјер Жињак од пенал да ги врати Французите во игра. Тоа само го разлути Мексико кој преку Уриел Антуна и Едуардо Агире додаде уште два гола.
Домашната репрезентација на Јапонија со минимални 1:0 ја совлада Јужна Африка благодарение на голот на Такефуса Кубо во 71. минута.
Резултати:
Група А
Мексико - Франција 4:1
Јапонија - Јужна Африка 1:0
Група Б
Хондурас - Романија 0:1
Нов Зеланд - Јужна Кореја 1:0
Група Ц
Аргентина - Австралија 0:2
Египет - Шпанија 0:0
Група Д
Брег на Слонова Коска - Саудиска Арабија 2:1
Бразил - Германија 4:2