Случајот со бразилскиот селектор Фернандо де Карваљо Лопес ги шокираше сите во Бразил, но и ширум светот, откако беше прогласен за виновен за силување на четири спортистки, за што беше осуден на 109 години и осум месеци затвор.
Случајот беше откриен во 2018 година и тој конечно беше осуден по сексуалната злоупотреба на четири спортистки, од кои едната е малолетна. Но, тоа не беа единствените обвинувања, бидејќи повеќе од 40 спортистки и жени открија дека Лопес ги злоставувал меѓу 1999 и 2016 година.
Според весникот Глобо Еспорте, една од жртвите имала само 13 години кога на родителите им кажала што ѝ се случило во гимнастичкиот тим во 2016 година. Кога се прошири веста за нападот, се јавија уште седум лица, некои како сведоци, а други како жртви, иако случајот беше на маса повеќе од две години.
Тоа беше во 2018 година, а по повеќемесечна истрага, околу 40 лица излегоа да го тужат поранешниот тренер за сексуална злоупотреба, поради што Вишиот спортски суд му забрани да се занимава со гимнастика.
Но, Карваљо Лопес, кој беше исфрлен од репрезентацијата на Бразил еден месец пред Олимпијадата во Рио во 2016 година, инсистира дека е невин и ќе поднесе жалба на пресудата, па му е дозволено да остане на слобода за време на жалбената постапка.
Во пресудата, судијката Фернанда Алвес да Роча наведе дека по докажаните злосторства врз четирите жртви, вкупната казна е 109 години и осум месеци затвор. Таа додаде дека тој е осуден на затворска казна поради сериозноста и суровоста на кривичното дело кое обвинетиот го сторил подолг временски период, во кое го користел својот статус на тренер и авторитетот што го имал.
