Свет

Брегзит ја турна Британија од елитната петорка

23. ноември 2017 - 14:30 | Макфакс

Британскиот министер за финансии, Филип Хамонд, призна дека Велика Британија повеќе не е меѓу петте водечки глобални стопанства, претставувајќи го во Парламентот извештајот за буџетот.

„Британија е шесто најголемо стопанство во светот“, истакна Хамонд во обраќањето пред Парламентот.

Последните бројки објавени од ММФ откриваат дека Франција ја надминува Британија во годишното рангирање на глобалните стопанства.

Рејтингот се базира на прогнозите за БДП, а како што соопшти ММФ, Франција првпат од 2013 година ја надминала Британија.

САД, Кина и Јапонија се рангирани на првите три места според рејтингот на ММФ за 2017 година, со Германија и Франција на четвртата и петтата позиција.

Индија е веднаш зад Британија, која може да падне подолу бидејќи Индија се очекува да биде на врвот и да ги надмине и Велика Британија и Франција во 2019 година.

Падот на рејтингот на Велика Британија, наводно, беше предизвикан од зголемувањето на цените и драстично послабата национална валута, што ја следеше одлуката на земјата да се повлече од Европската Унија.

Коментирај