BBC го откри својот избор на водители за овогодинешното издание на Евровизија во Ливерпул.
Тимот од четири водители го сочинуваат Грем Нортон, Хана Вадингам, Јулија Санина и Алеша Диксон.
Како што наведуваат, големото финале ќе го водат сите споменати водители - Грем Нортон, украинската пејачка Јулија Санина, актерката Хана Вадингам и пејачката и водителка Алеша Диксон. Двете полуфинални вечери ќе ги предводи женското трио -Јулија Санина, Хана Вадингам и Алеша Диксон.
Покрај нив на сцената како поддршка ќе бидат и Рилан, Скот Милс, Мел Гидројк, Тимур Мирошниченко и Сем Куек.
Популарниот ТВ водител и британски евровизиски коментатор ќе биде дел од водителската постава во финалната вечер. Неговото најпознато шоу, „The Graham Norton Show“, освои БАФТА во 2009 година.
Хана е британска пејачка, актерка и изведувач во бројни мјузикли на Бродвеј и Вест Енд. Ја освои наградата Еми за улогата во серијата „Ted Lasso“.
Јулија беше финалистка во „Танц со ѕвездите“ на Украина и член на жирито во шоуто „Х-фактор Украина“. Во 2016 година учествуваше на Видбир со нејзиниот бенд „THE HARDKISS“ и го освои второто место. Исто така, украинската публика ја избра да биде член на жирито на овогодинешното издание на Видбир и да учествува во изборот на украинскиот претставник во Ливерпул.
Алеша е британска пејачка и ТВ водителка. Кариерата ја започна во бендот „Mis-Teeq“, а подоцна продолжи со успешна соло кариера. Нејзината песна „The Boy Does Nothing“ беше една од најслушаните песни во 2008 година и постигна високи позиции на различни европски топ листи.
