Чилеанскиот напаѓач, Алексис Санчез, наводно се кае поради тоа што во јануари од Арсенал премина во редовите на Манчестер Јунајтед, тврди британскиот „Daily Mail“.
„Санчез изгледа како уморен и разочаран човек. Несреќен е и тоа се гледа. Често јаде во кантината потполно сам. Велат дека сериозно размислува за тоа дали згрешил што дошол овде. Алексис изгледа како некој кој не сака да биде таму кај што е. Во целата оваа ситуација тој изгледа како изгубено момче. Потполно беше исто и со Анхел Ди Марија“, тврди неименуван извор од Јунајтед за „Daily Mail“.
Санчез во досегашните десет натпревари, во кои го носеше дресот на „Црвените Ѓаволи“, постигна само еден гол, а последниот меч во Фа Купот го помина на клупата за резервни фудбалери.
За потсетување, споменатиот Ди Марија исто така во Јунајтед пристигна како големо засилување, но не се вклопи, па после само една година направи трансфер во ПСЖ.