Британска манекенка, чиј идентитет не беше објавен, била киднапирана во Милано, а потоа „продавана“ на аукција на нелегални интернет мрежи, соопшти италијанската полиција.
Дваесетгодишната девојка била држена заробена седум дена и дрогирана со кетамин. Киднаперот е идентификуван како Лукаш Херба (30), родум од Полска, со британско државјанство. Тој се обидел да ја продаде манекенката преку интернет за 300.000 евра во биткоини.
Тој успеал да на намами девојката, ветувајќи ѝ фотосесија, а потоа ја дрогирал, ѝ ставил лисици и ја спакувал во куфер. Ја ставил во гепекот на автомобилот и возел кон јужниот дел на Милано, а потоа ја однел на фарма во близина на Торино.
Херба на полицајците им рекол дека имал секс со девојката, па сега се утврдува дали станувало збор за силување или сексуален однос со согласност. Потоа побарал од неа 50.000 евра за да ја ослободи и ѝ се заканувал дека ќе ја убие ако пријави во полиција.
Службите рекоа дека киднаперите во еден момент сакале да ја ослободат бидејќи е мајка на двегодишно дете, а нивното правило било да не киднапираат мајки.
Манекенката стигнала во Милано на 11 јули и набрзо потоа била киднапирана. Истражителите рекле дека киднапирањето било многу добро организирано. За случајот дознале од нејзиниот агент кого киднаперите го контактирале и исто така му барале пари за откуп.
Полицијата долго време го следела Херба, открила каде живее и извршила рација на станот при што биле запленети неговиот компјутер, мобилниот телефон, фотографии и други предмети.
Херба признал сѐ, а полицијата трага по неговиот соучесник бидејќи девојката рекла дека ја киднапирале двајца мажи.
Херба е поврзан со криминалната група „Black Death“ што оперира на нелегалните интернет мрежи познати како darknet.
