На YouTube неодамна е објавена британска репортажа од 1989/1990 за летување во Југославија, поточно во Хрватска, која детално известува за природните убавини, туристичката понуда, цените, плажите, но и високата инфлација во тоа време.
Репортажата почнува во Опатија и продолжува да раскажува за бројните мали одморалишта до кои може да отидете со автомобил или брод.
Наратор и презентер е британскиот новинар Џон Картер кој исто така се појавува на снимките и зборува за сопствените впечатоци од местата кои ги посетил.
Истакнува дека на плажите нема песок, но дека тоа не им пречи на туристите. Говори и за архитектурата, австроунгарското наследство во Опатија и мешавината на старото и новото.
Кога е во прашање вредноста на тоа што го добивате за потрошените пари, вели дека тој сооднос е одличен за странците благодарение на високата стапка на инфлација и економските проблеми со кои се бори земјата. Открива дека претежно се плаќа во германски марки, но дека примаат и британски фунти.
Го опишува и секојдневниот друштвен живот и што може да очекувате од локалните кафичи и ресторани.
Репортажата го прикажува и тазе изградениот мост кој го поврзува островот Крк со копното, кој во тоа време бил најголем на Јадранот.
Спомнува и приватно сместување истакнувајќи дека за него никогаш нема да пронајдете никакви брошури во кои однапред може да видите што се нуди, туку за тоа се одлучува на лице место.
„Претходно ги истакнав добрите услови во смисла што добивате за одредена количина пари, но вредноста на одморот може да се мери и на друг начин, не само во пари. Се мери и по количината на уживање и задоволство во секој ден, а верувајте ми дека во секој ден поминат тука ќе добиете многу задоволство”, порачува на крај Картер.