Британската тенисерка Ема Радукану е победник на финалето од УС Опен откако успеа со 2:0 по сетови да ја совлада врсничката Фернандес.
На овој грен-слем Радукану дојде како 150 рангирана на ВТА листата и со тоа стана првата тенисерка во историјата која преку квалификации дошла до грен-слем титула. Воедно, таа е и најмлада победничка после Марија Шарапова која во 2004 го освои Вимблдон на 17-годишна возраст.
Радукану ноќеска ја совлада Канаѓанката Лејла Ени Фернандес со 6-4 и 6-3. Натпреварот беше неизвесен и траеше 1 час и 52 минути.
Да биде сензацијата уште поголема, Радукану до титулата на терените во Њујорк дојде со низа од 10 победи, од кои 3 во квалификациите и тоа без загубен сет.
Последен пат британска тенисерка која освоила грен-слем турнир беше пред дури 44 години кога Вирџин Вејд победи во Вимблдон.
Инаку, одличен турнир имаше и Фернандес, 73 рангирана. Таа на патот до финалето успеа да исфрли фаворитки од топ 10 како Наоми Осака, Елина Свитолина и Арина Сабаленка, како и поранешната трикратка победничка Анжелик Кербер.