Според британски експерти, и покрај пронаоѓањето на вакцина светот со децении ќе живее со коронавирусот.
Вака реагираат дел од британските доктори по коментарот на британскиот премиер Борис Џонсон, кој се надева дека до Божик оваа држава ќе се врати во нормален живот.
Борис Џонсон ова го кажа кога ги изнесе плановите за ублажување на мерките за превенција од ширење на коронавирусот. Тој најави отворање на забавните центри и на затворените базени, а масовни собири ќе има од есен.
Но, реакцијата на експертите е дека на работите треба да се гледа реално и дека вирусот и понатаму ќе биде присутен.
„До Божиќ работите нема да се поправат. Дури и ако имаме вакцина или добар лекарски третман, човештвото со овој вирус ќе живее уште многу, многу години, децении кои се пред нас“, изјави д-р Џереми Фарар.
На почетокот на летото тој изјави дека овој период е клучен за спречување на втор бран на коронавирусот и додаде дека е многу важно дополнително да се зголемат капацитетите за тестирање и дека треба се вложуваат пари во лекување и вакцинација.
Професорот Џон Бел од Оксфорд вели дека се мали шансите вирусот да биде елиминиран и покрај позитивните вести дека произведените вакцини активираат имунолошки одговор на коронавирусот.
„Реалноста е дека овој патоген засекогаш ќе биде овде, нема да исчезне. Веројатно вакцината нема да има траен ефект така што ќе мора да имаме континуиран циклус на вакцинација. Затоа мислам дека идејата за елиминирање на вирусот е нереална“, вели Бел.