Свет

Британскиот Парламент го отфрли Договорот за Брегзит

12. март 2019 - 21:02 | МИА
Лондон, 12 март 2019 (МИА) – Долниот дом на британскиот Парламент вечерва со 391 глас „против“ и 242 гласа „за“ вторпат го отфрли Договорот за Брегзит, што претставува нов тежок удар за обидите на премиерката Тереза Меј за регулирано истапување на Велика Британија од ЕУ.

При првото гласање на 15 јануари, „против“ Договорот се изјаснија 432 пратеници, а 202 беа „за“.

Повеќето од евроскептичните пратеници, кои се изјаснија против документот, изјавија дека „правно обврзувачките“ промени во Договорот, што вчера ги постигнаа Меј и претседателот на Европската комисија Жан-Клод Јункер и кои предвидуваа заштитен механизам за „ирската граница“, не биле „доволно убедливи“.

По вечерашното отфрлање на Договорот, се очекува Меј да побара пратениците утре да се изјаснат за можноста за Брегзит без договор, а доколку го одбијат и тоа, в четврток да гласаат за евентално одлагање на британското напуштање на Унијата, предвидено за 29 март.

Во обраќањето до пратениците пред вечерашното гласање, Меј ги повика да го поддржат Договорот, нагласувајќи дека во спротивно е можно Велика Британија да остане во ЕУ.

– Работата е јасна… Оние кои сакаат да дојде до Брегзит, мислам дека треба да знаат оти ако вечерва не го усвоиме овој Договор, ризикуваме Брегзитот воопшто да не се случи, истакна Меј.

Главен спорна точка во Договорот за евроскептичните британски пратеници беше одредбата за „ирската граница“, која предвидуваше статусот на границата меѓу членката на ЕУ, Република Ирска и британската покраина Северна Ирска да остане ист каков што е сега и за време на преодниот период по Брегзит, што би требало да трае до крајот на 2020 година и во кој треба да се најде конечно решение.

Тврдокорните приврзаници на Брегзитот, пред се во редовите на Конзервативната партија на Меј, не се согласуваат со ваквата одредба во Договорот, бидејќи стравуваат дека со тоа Велика Британија би можела да остане „врзана за ЕУ, можеби и на неопределено време“. 

Коментирај