Риши Сунак изјави дека таканаречената „златна ера“ во односите со Кина е завршена и вети дека неговата влада ќе го промени односот на ОК кон земјата.
Во својот прв надворешнополитички говор, британскиот премиер рече дека врските со Кина во претходната деценија биле „наивни“. Тој рече дека ОК мора да се бори со „силен прагматизам“ со своите конкуренти.
Тој предупреди на „реториката на Студената војна“, додавајќи дека глобалната важност на Кина не може да се игнорира. Сунак се соочи со притисок од ториевците да го заостри ставот на Велика Британија кон Кина откако минатиот месец ја презеде функцијата лидер на партијата и премиер на Велика Британија.
Говорот, на банкет во Лондон, доаѓа по протестите во Кина против строгите ограничувања за Ковид. Полицијата уапси неколку, а новинар на BBC беше приведен додека известуваше за протестот во Шангај во неделата. За време на апсењето, полицијата го тепала и клоцала, а неколку часа го држела во притвор пред да го ослободи.
„Кина претставува системски предизвик за нашите вредности и интереси, предизвик кој станува сè поакутен додека се движи кон уште поголем авторитаризам“, рече Сунак.
Сунак нагласи дека Британија сè уште не може да ја игнорира важноста на Кина во светските работи, за глобалната економска стабилност или прашања како што се климатските промени.
Британскиот премиер и кинескиот претседател Си Ѓинпинг требаше да се сретнат за прв пат на самитот на Г20 во Индонезија на почетокот на овој месец, но средбата беше откажана по ракетната експлозија во Полска.
