На угостителските места повеќе нема да им биде дозволено да ги поставуваат своите системи за ладење под 27 Целзиусови степени во лето, ниту да го подигнат греењето над 19 степени во зима.
Британските туристи кои ќе ја посетат Шпанија ќе се „испечат“ поради новите мерки за заштеда на енергија со кои се забранува климатизацијата да биде пониска од 27 Целзиусови степени во лето, предупреди шефот за туризам.
Мерките ќе важат за канцелариите, продавниците, баровите и рестораните, како и за системите за јавен транспорт и транспортните центри. Од продавниците ќе се бара да ги држат своите врати затворени за да се одржат температурите.
Тие се дел од напорите на Шпанија да ја намали употребата на гас за 7% според неодамнешниот договор со Европската Унија за намалување на зависноста од рускиот гас.
Според новите правила, од 22 часот ќе треба да се изгаснат и светлата на излозите на продавниците и празните владини канцеларии.
Сепак, Шпанија моментално доживува многу топло лето, со температури над 40 степени Целзиусови во многу делови, а претседателот на туристичкиот одбор на Коста дел Сол ги критикуваше мерките.
„Сакаме задоволни туристи, а не печени туристи или оние кои се плашат да одат по темни улици“, рече Франциско Саладо.
Тој ја повика владата „да ја троши менталната енергија на поефикасни мерки“.
Тој додаде: „Тоа е како оваа уредба да е напишана од некој марсовец, некој кој е длабоко неук за нашата земја и кој не се консултирал со никого“.
Тој додаде дека „нема смисла“ да се принудуваат хотелите, рестораните, баровите, музеите, кината, продавниците, железничките и автобуските станици и аеродромите да го подигнат својот термостат во лето на 27 степени „токму среде топлотен бран“.
На почетокот на оваа недела беше откриено дека туристите можат да продолжат да ги чуваат своите хотелски соби разладени, бидејќи тие се сметаат за „приватни простори“, но сите други јавни површини ќе мора да се придржуваат до новите закони.
Премиерот Педро Санчез го објави новиот пакет минатата недела, велејќи: „Само треба да влезете во трговски центар за да сфатите дека можеби температурата е премногу ниска“.
Шпанските јавни институции веќе работат со слични прописи за заштеда на енергија.
Владата вели дека мерките не само што ќе заштедат енергија, туку и ќе ги намалат сметките за домаќинствата и бизнисите.
Шпанија е една од најжешките европски земји во лето. Земјата веќе имаше два топлотни бранови оваа година, а температурите се прогнозира повторно да се зголемат во првите недели од август.
