Две главни детски хуманитарни организации наведуваат дека бројот на деца во земјите со сиромашни и средни приходи, кои живеат под границата на сиромаштија, може да се зголеми за 86 милиони, на вкупно 672 милиони до крајот на оваа година, како резултат на економското влијание на пандемијата на COVID-19.
УНИЦЕФ и хуманитарната организација за заштита на правата на децата „Save the children“ во анализа објавена вчера наведуваат дека речиси две третини од сите деца кои живеат во сиромаштија се во Африка и Јужна Азија.
Земјите во Европа и Централна Азија може да забележат зголемување од 44 проценти во регионот, додека во Латинска Америка и на Карибите зголемувањето би можело да биде околу 22 проценти.
Двете организации повикаа на брзо и масовно проширување на системот за социјална заштита и низа програми, вклучително и парични трансфери, училишни оброци и детски додатоци за решавање на итните финансиски потреби.
