Напаѓачот на Барселона Антоан Гризман доби жестоки свирежи од навивачите на Атлетико Мадрид на почетокот на мечот меѓу двата клуба на стадионот „Ванда Метрополитано“ во Мадрид.
Гризман во летниот преоден рок го напушти Атлетико Мадрид и дојде како засилување во Барселона со трансфер вреден 120 милиони евра.
Навивачите на мадридскиот клуб не можат да му простат на Французинот што го договарал трансферот во Барса во текот на минатата сезона додека уште играше за „јорганџиите“.
Гризман играше за Атлетико пет години и беше најдобриот играч и херој на трибините, но преку ноќ стана предавник.
Така Гризман стана „персона нон грата“ на „Ванда“ и од навивачите на поранешниот клуб синоќа беше дочекан прилично морбидно. Покрај свирежите од трибините кога неговата фотографија се појави на големиот екран и секојпат кога ќе ја допреше топката на теренот, пред стадионот каде што се наоѓа неговата плакета тие оставаа играчки стаорци и лименки пиво.
На трибините го дочекаа со брутален транспарент: „Сакаше да си направиш име, а заборави да бидеш човек“.
