BMW неодамна се сврти кон нов дизајнерски јазик што не им се допаѓа на сите. Исклучително големата предна решетка често е мета на критики, особено на социјалните мрежи.
Баварскиот производител вели дека ја слуша јавноста, но сепак не гледа причина за промена на новиот дизајн.
Со претставувањето на BMW Серија 4, одеднаш се појави нова маска на ладилникот што ќе ја гледаме на повеќе модели во наредните години. „Бубрезите“ се прилично големи – некои ги сакаат, некои ги мразат.
Дизајнерот на BMW Домагој Џукец од Хрватска вели дека критиките не се причина да не спие навечер.
„Не можете да направите дизајн што го сакаат сите. Секој внатре и надвор од компанијата има свое мислење и различен вкус. Ако навистина сакате да се истакнете, мора да излезете со нешто поразлично и препознатливо“, изјави тој за британски AutoExpress.
Новата дизајнерска насока на BMW може да се види и на електричниот модел iX, додека Gran Coupé и сродниот i4 исто така ја следат истата линија на дизајн.
„Секој што има потешкотии со тоа, ќе мора да се навикне“, објаснува Џукец.
Според него, BMW автомобилите треба да имаат нешто што ги издвојува од конкуренцијата и треба да бидат различни.
Сепак, шефот на одделот за дизајн на BMW, Холанѓанецот Адријан ван Хојдонк, изјавува дека реакциите се сфаќаат сериозно.
„Исто така ги следиме социјалните медиуми, но не знаеме дали навистина станува збор за клиенти. Ги слушаме тие ставови и планираме да ги вклучиме во процесот на дизајнирање“.
