Легендарниот италијански голман сега има 43 години, а крајната граница која ја одреди е пензионирање на 45.
Џанлуиџи Буфон веќе требаше да биде во пензија. Неговиот првичен план беше да се повлече по Мундијалот во Русија во 2018 година, но кога Италија не успеа да се пласира, падна во вода и неговиот план да се појави на рекордното шесто Светско првенство. Уште тогаш се насочи кон Катар 2022 година и токму затоа продолжи да игра.
„Видете, во мојата глава навистина има еден 'стоп' знак, максимална точка, а таа е јуни 2023 година. Тоа е максимумот, навистина, навистина таму е крајот. Но, би можел да прекинам и за четири месеци...“, вели Џиџи говорејќи за The Guardian.
Летото 2018 наместо да престане се одлучи да премине во ПСЖ, каде одигра само една сезона, а потоа се врати назад во Јуве каде и ден денес е, иако резерва на полскиот голман Војчех Шченсни.
„Јас сум личност која цврсто верува во судбина. Кога Јувентус ми понуди шанса да се вратам, си помислив: 'Господе! Никогаш не се знае, можеби постои некоја причина, нешто поради кое ми е пишано да се вратам таму. Една последна приказна да се испише'“.
Во меѓувреме Буфон успеа да го урне рекордот на Паоло Малдини за најмногу настапи во Серија А, 654 до овој момент, рекорд кој тешко дека некогаш ќе биде срушен.
За репрезентацијата на Италија нема настап од 2018 година кога изјави дека се повлекува, но неговото константно одложување на пензионирањето, и сега најавата дека тоа ќе го стори во јуни 2023 година, после Мундијалот во Катар, најавува дека Џиџи се надева дека на стара слава ќе биде во репрезентацијата како трет голман.
„Така да, да бидам искрен, има дел од сето ова кој се сведува и на малку его, кое секој од нас го има“, искрено вели Буфон.
Моментално Буфон е на делба на првото место со уште тројца други фудбалери како играчи кои биле дел од најмногу Мундијали, пет. Останатите се Лотар Матеус (Германија), Антонио Карбахал (Мексико) и Рафаел Маркес (Мексико). Единствената разлика е што сите останати одиграа барем еден натпревар на сите пет Мундијали, додека Буфон не одигра ни минута на својот дебитантски Мундијал, оној во 1998 во Франција кога му беше резерва на Анџело Перуци. Потоа играше во 2002, 2006, 2010 и 2014.