Џанлуиџи Буфон стави крај на сите шпекулации во врска со неговата иднина, барем во клубот од Торино.
И на 43 години Буфон не вели дека ќе се пензионира, туку дека ќе го напушти Јувентус.
„Мојата иднина е јасна и дефинирана. На ова убаво и долго искуство со Јуве годинава ќе му дојде дефинитивен крај“, рече Буфон говорејќи за beIN Sports.
Тој во Јуве ја привршува својата 19-та сезона, а пристигна летото 2001 година од редовите на Парма. Престојот во Торино на кратко го прекина кога во сезоната 2018/19 застана на голот на ПСЖ.
„Или ќе престанам да играм, или, доколку најдам нешто кое ќе ме мотивира ќе продолжам да играм, или ќе почнам поинакво животно искуство. Ќе земам сѐ предвид“.
Очигледно Буфон не е сигурен што сака да прави, па не ја сиклучи можноста да продолжи да игра, но во друг клуб.
„Чувствувам дека на Јуве му дадов сѐ. И добив сѐ за возврат и повеќе од тоа не може. Дојдовме до крајот на еден циклус и правилно е еден да го наруши балансот“, заврши тој.