Италија нема да биде помеѓу учесниците на претстојното Светско Првенство откако вчера го изгуби бараж двомечот со Шведска, со конечен резултат од 0:1 по двата натпревари.
Првпат по 1958 година Италија не успеа да се квалификува за Светско Првенство.
Сан Сиро беше спремен за славје, за успех и за победа на репрезентацијата на Италија, но швеѓаните им ги расипаа плановите, одигрувајќи 0:0 и не давајќи им шанса на италијанските навивачи да се израдуваат за барем еден гол.
По натпреварот легендарниот Џанлуиџи Буфон се прости од репрезентативниот дрес, и низ солзи го спроведе последното интервју во голманската униформа на репрезентацијата на Италија.
„Ова е разочарување, не само за мене, туку за целиот фудбалски свет. Не успеавме во нешто што е важно за државата“, изјави Буфон по натпреварот.
Од друга страна, пак, селекторот Џампиеро Вентура ги негираше тврдењата дека ќе ја напушти клупата на Италија и рече дека ќе остане таму додека не се искупи за овој неуспех. Тој има договор до 2020 година.