Бугарскиот боксер во тешка категорија Кубрат Пулев славно го совлада Богдан Дину во Лас Вегас во саботата вечерта во Лас Вегас, што беше негова 27-ма победа во 28 професионални борби. Она што се случи потоа воопшто не беше славно.
Новинарката Џенифер Равало од весникот Vegas Sports Daily му правеше интервју по борбата. При крајот на интервјуто, Равало го праша Пулев дали заслужува да добие шанса против британскиот поранешен шампион во тешка категорија Тајсон Фјури.
Триесет и седумгодишниот боксер одговори со одлучно „да“ и потоа неочекувано ја бакна Равало на уста и си замина.
Равало во моментот изгреагира зачудено и со насмевка, но подоцна на Twitter доби прашање во врска со инцидентот и рече дека ситуацијата била „засрамувачка“ и „чудна“.
Инцидентот во Лас Вегас потсетува на сличен срамен момент на Френч Опен во 2017 година кога францускиот тенисер Максим Аму беше избркан од турнирот бидејќи се обиде насила да ја бакне новинарката Мали Томас за време на ТВ-интервју во живо.